Engtin nge competitive exam tam zawkah kan tlin theih ang?

L. Thangmawia*

He zawhna "Engtin nge All India Competitive Exam-ah thalai ram zawk kan tlin theih ang?” tih hi zawhna chhan awl ang reng, har ang reng tak, mahse a chhanna pawimawh tak ni si a ni. Chhanna tam tak a awm thei awm e. A chhanna tam tak lam aiin rilru lama tihhlawhtlin tumna tak tak a pawimawh zak ngeiin a rinawm.


All India Competitive Exam hi eng nge maw a nih le? Competitive exam han tih hian kan rilruah IAS, IPS,IFS, etc. vel a lang nghal deuh ber thin a. Competitive tih awmzia chu kan hriat angin inelna tihna mai a ni a. All India a nih chuan India ram pum huap tihna a ni leh mai a. Tichuan, All India Competitive Exam a nih chuan India ram pum huapa inelna tihna a ni mai. Chuti a nih chuan All India Competitive Exam tih chuan hna exam chauh a kawk chuang lo va, civil service exam mai bakah Indian Economic/Statical Service, India Forest Service te, engineering leh medical entrance exam te MBA zir tura Common Admission Test te pawh a huam tel vek a ni. Entir nan, India rama engineering college tha bera ngaih Indian Institute of Technilogy (IIT)-a lut tur chuan India ram pum huapa entrance test-a tlin a ngai a. Tin, damdawi in tha, All India Institute of Medical Sciences (AIIMS), New Delhi-a doctor zir tur chuan entrance exam-a tlin a ngai bawk a ni. Henga tling, zir chhuak hi Mizoram atang hian an la tlem em em a ni. Tin, hetiang mai bakah hian central-a hna tam tak lak nan hian sorkar chuan India ram pumhuapin inelna a buatsaih thin bawk a. Chung zingah chuan assistant grade a lut tur leh clerk grade-a lut tura Staff Selection Commission-in kum tina Combined Graduate leh Combined Matric Level Exam a buatsaih te, Railway ministry-a thawk tura Railway Recruitment Board-in exam a buatsaih thin te, bank liana thawk tura Banking Services Recruitment Board-in exam a buatsaih thin te, Life Insurance Corporation-in a hna thawk tur a lakna exam te, sipai officer-a lut tura Combined Defence Services leh National Defence Academy exam mai bakah Airman, Sailor etc. exam te, CSIR-UGC hnuaia NET exam kan tih fote hi All India Competitive Exam chu an ni vek a ni.

Kan Officer lian thenkhat ten an sawi fo thin chu, “Kan state thenawm thalaite chuan central department hrang hrangah hna chi hrang hrang an thawk fur tawh a ni,” tih hi a ni. Kan state thalaite erawh hi chuan kan la ngaihsak tawk lo niin a lang. IAS tih vel hi chu kan hre larin nih chak pawh kan tam viau niin a lang a. Mahse, mi zawng zawng hi IAS kan nih vek theih dawn loh avangin All India Competitive Exam dang dangahte pawh thalai tam tak kan luh a ngai a ni.

Inelna exam-a tling tur chuan a hmasa bera pawimawh chu ‘tuma chian’ a ni. Tum ti chiang thei tur chuan career guidance lam hawi lehkhabu chhiar thin te leh career expert te rawn taimak a tha hle. India rama zirlai tam tak chuan high school an chhuahsan hmain an tum an tichiang thin a. IAS nih tum chuan college an luh tirh atangin tan an la tan a, vawi thum bak civil service-ah an inlan thei lo. Chutianga goal fel tak neia lehkha zir chho te nen kan la inel dawn a ni tih thalaite hian kan hriat a ngai a ni. Kan state-ah phei chuan thalaite hian hna kan ngah hle a. Thlan laih, knhawhar in kal, inkhawm, hnatlang, etc. nei ve mang lo Bombay, Delhi nula/tlangvalte nen kan inel dawn a nih tih hi kan rilru hian hre kar ila, Mizorama kan awm si chuan hengte hi tih a ngai bawk si. Chuvangin, kan hun awl neih zawng zawng hi inchhiar nan kan hman a ngai a ni. Zirlai tam tak te chu tum nei mumal lovin, admission tih dawnah pawh thiante thlan ang ang subject thlang mai mai kan tam niin a lang a, hetiang a nih chuan All India Competitive Exam-ah thalai tam zawk kan lang thei ngai lo vang. Chuvangin, thalai tuma kan chian em em a ngai a, exam-a tling ve ngei tur chuan thapui thawha beih fat fat a ngai.

A dawt lehah chuan taimakna leh tumruhna neih a ngai a ni. All India Competitive exam tam tak chu thla khat chhung lek zir vaka tlin theih a ni lo. Entirnan, civil services exam ( kan hriat thiam dan turin IAS exam) hi December thlaah advertise a ni tlangpui a, exam tumte tan chuan December atangin lehkha chhiar nasat a ngai. Kum thar May thlaah exam thawhkhatna exam ni khat awh a lo awm ta a. Heta tlingte tan main exam kum tawp lamah a awm leh chauh thin. Heta la tling zel te tan main exam result chhuah hunah interview a lo awm leh a, chuti a nih chuan heta tling tur chuan a tlem berah kum khat zenzawn exam lai ang renga lehkha chhiar a ngai tihna a ni. Hei hi entirna pakhat chauh a ni a, exam dang dang te pawh all India level chin chu zan hnih khat zir vaka tlin mai chi a ni lo tlangpui. Chuvangin tum kan neih fel tawh chuan kan tumah kan ruh hle a ngai. Chumi tihlawhtling tur chuan taima taka kumpui lingleta kan beih a ngai ta a ni. IAS tling ten an mahni kawmtu te hnena an sawi tlawngpui chu “ There is no escape to Hard Work” tih tawngkam hi a ni a. A Mizo tawng chuan “ Thawhrim a ngai a ni” tihna a ni mai awm e. Thawkrim tur chuan taimak a ngai a. Chuvangin tumruha leh taimakna thalaite’n kan neih a ngai khawp mai.

A pathumna atan chuan nu leh pa leh chhungte phurpuina mai bakah khawtlang anga ngaihsanna kan pek a ngai. Nu leh pa tam tak chuan kan fate kan hmuh phak MIzoramah hna thawk se tihna kan la nei lian hle a ni. Hei hi a awmzia ber chu India ram pum rilru kan la put phak loh vang ni in a lang. “I rah chin a piang i ram” tih hi All India Competitive Exam-ah hian a lang chiang hlein a hriat. Delhi te pawh kan ram a ni a, Tamil Nadu te pawh kan ram a ni tih hi hre chiang ila. Nu pakhat phei chuan ka hnenah, “IAS an nih a, vai rama an awm daih ai chuan kan khaw high school zirtirtu pawh ni se, ka duh zawk," a ti a ni. He tiang rilru nu leh pa te’n kan put chhung chuan All India Competitive Exam-ah kan thalaite an lang tam thei lo mai thei a ni. All India a nih chuan India ram khawi laiah pawh an thawh a ngai tlat si a. Tin, vantlang khawtlang anga ngaihsan nih hi thalai ten kan chak em em thil pakhat a ni a. Entir nan, sipai ngaihsan an nih lai chuan thalai tam tak sipaiah an tang a, driver ngaihsan an nih lai chuan thalai tam takin driver nih an chak a, an ni reng bawk a. Engineer leh doctor ngaihsan an nih lai chuan kan thalai lehkhathiam ber berte an training sup sup a ni. Hetia kan sawi avang hian sipaite, driver te, engineer/ doctor te kan ngai nep a ni lo; khawtlanga ang a kan ngaihsan rawn lai sawina mai a ni. Tunah chuan IAS hi kan ngaisang hlein a hriat a, nih tuma coaching kal pawh Delhi-ah an awm nual a ni. Mahse, central-a hna tha tak tak dang IAS, IFS etc. ni chuang lova lut ngamte pawh hi ngaisang ngam ila. Kan thalai tha tak tak an thiam loh vang ni lova vanduai vang liau liau a IAS tling ta lo te pawh hian central-ah assistant hna te, clerk hna te airman hna te, sailor hna te, railway tricket collector te an thawk huai huai ang a. State danga zin tul chang pawhin kan chhawr viau tur hi a ni a. He thil hi kan khawtlang hnarkaitute pawhin kan hriat fuh ngat chuan All India Competitive Exam- hrang hrangah tam zawk kan tling ngei ang. Tin, central-a thawkte tan departmental exam atangin kaisanna chance pawh a tha hle a. Clerk atang tan pawhin director dinhmun pawh a luh theih a ni. India Foreign Service-a Mizo pa, Pu Vanlalhuma chuan direct-a IFS ni lo, hniam deuh zawka tan te pawh IFS (confer) thin an ni, a ti a ni.

A dawt lehah chuan zirtur (study material) thaa coaching Centre tam takte chuan study material tha tak tak an siam chhuak a. Heng material an siam chhuah te hi a man a to tlangpui hlawm. Chuvangin, zirlai thiamthei chhungkaw harsa tak si te tan chuan chah mai mai chi a ni lo. Heta tan hian library tha tak, India rama coaching centre hrang hrang te’n study material an siamte awmna, a duh apiangin kan chhiar theihna kan neih a ngai a ni. Kan rama thalai tlem tê chuan coaching kalna tur pawisa an nei a ni mai thei a, a tam tam zawk te tan chuan Delhi, Madras vela coaching kal chu vana rah ang a ni thung. Chuvangin, thalai tam zawkte competitive exam-a an tlin theih nan competitive beih tumte tan bika library neih hi thil tul tak a ni. Zir tur tha tak kan thalaite’n an neih phawt chuan coaching kal kher lo pawhin competitive exam hi an tling thei em em a ni.

A palina atan chuan sorkar pawimawhna lam lo sawi ve ta ila. A chunga kan sawi tak te atang hian sorkar pawimawhna kan hre thei mai awm e. Zirlaite’n an career an thlanna kawnga pui turin career guidance gentre tha tak te, library tha tak te hi sorkar hian nei tura hma a lak a ngai a ni. Tin, zirlai thiam thei leh tumruh chhungkaw harsa si te pawh a tul anga dawmkan dan ngaihtuah a, coaching kaltir hial thlengin sorkar chuan a ti thei a ni. Tin, career guidance programme sikul hrang hranga huaihawt te Radio leh Doordarshan-a a hunbi neia tih chhuahte thlengin sorkar chuan hma a la thei a ni.

A tawp ber atan chuan thalaite’n kan rilru put hmang a tul anga kan thlak a ngai a ni. Khawvel tidanglamtu berte chu thalaite an ni a. Kan nu leh pa te emawin kan beisei ang an lo ti lo a nih pawhin demna thu chhak chhuak a, kut kuangkuah mai lovin, mahnia inhai chhuah dan dap a tul a ni. Tuna kan tana tangkai tak tak hmu chhuaktu te pawh hian hmuchhuak tura an beih laiin sorkar tanpuina leh hmalakpuina te, nu leh pa phurpuina te an dawng vek lem lo tih kan hre theuh va. Thil tha lamah chuan mahni kal kala kal tul chang pawh a awm thin. Mahni ngei kan inhaichhuahnaah chuan kan rawn tlak a, kan huai a, midangte tan malsawmna kan ni thei thin a ni. Tuna kan officer tam takte pawh hi an nu leh pa te’n lehkhazir tawh lo tura an tih pawha hawihhawm taka chhang a, zir lui te an ni nual mai. Tin, sorkarin tanpuina pek dan tur a duan hmaa harsa taka mi bel nawta inzir chhuakte pawh vawiin ni a min la dampui zingah an la awm a ni. Louis Fischer-a’n Mahatma Gandhi chu, “He belongs to the words,” tia a sawi anga Mizoram thalaite hi miin min sawi ve theih nan kan khawhawi ti zau ila. A tul chuan Bihar, Hongkong, London pawha hnathawk thei turin khawvel pumpui rilru put phak tum ila, kan awmna apiangah rinawmna nen taima takin thawk bawk ila, kan hnam ropuin zawk tur pawh a ni mai lo’ng maw…? Mizorama thawh tur mumal nei lo va chawlhnia necktie awrh leh zur thin ai chuan, export-quality rilru nei turin inbuatsaih ila, All India Competitive Exam mai ni lo, international level thleng pawhin kan tling chho thei ngei ang. Tih tak emah chuan India Prime Minister te, UNO Secretary General te thleng hian Mizoram thalaite hi kan lo ni chho thei a ni. Kan rilru put dan erawhin koro a su thui hle ang. Ruat lawk an awm chuang hauh lova chutiang ni turin kan rilru kan dah sang em, tih erawh ngaihtuah nawn fo a tul.

* Head Deptt. of Mathematics, Pachhunga University College

• Tweet
• Share
• Share
• Share
• Share